Ақмола облысында жол-көлік инфрақұрылымын дамыту бағытындағы жұмыстар жалғасуда. Биыл өңірде шамамен 600 шақырымға жуық автожол жөндеуден өтеді. Бұл жұмыстар тұрғындардың жүріп-тұруына қолайлы жағдай жасап, елді мекендер арасындағы байланысты жақсартуға бағытталған, деп хабарлайды Өңірлік Коммуникациялар қызметі, https://kokshetv.kz/ арнасына сілтеме жасап.
Жаңартылып жатқан маңызды бағыттардың бірі – «Макинск – Ақсу – Торғай» автожолы. Бұл жол шамамен 10 елді мекенді байланыстырады. Бірнеше жыл бойы жөндеу көрмеген жол тұрғындарға айтарлықтай қиындық тудырған.
Әсіресе, Біржан сал ауданының тұрғындары Степногорск қаласына жету үшін айналма жолмен жүруге мәжбүр болған. Себебі негізгі жолдың жағдайы нашар болғандықтан, жүргізушілер Ақкөл арқылы қосымша 40 шақырым жол жүруге тура келген.
Жергілікті тұрғындардың айтуынша, жолдың жағдайы ұзақ уақыт бойы мәселе болып келген.
«Жол өте нашар болды. Қыстыгүні жүру мүмкін емес еді. Жазда шұңқыр көп болатын. Шаң мен топырақтың арасында жүрдік. Көп қиындық көрдік», – дейді ауыл тұрғындарының бірі.
Қазіргі таңда аталған бағытта жөндеу жұмыстары басталып, жолдың сапасын жақсарту бойынша жұмыстар жүргізілуде. Жоба аясында шамамен 100 шақырымға жуық жолды жаңарту жоспарланған. Жұмыстарды екі мердігер ұйым атқарып жатыр, ал сапа арнайы мамандар тарапынан бақылауда.
Техникалық бақылау мамандарының мәліметінше, жол жөндеу жұмыстары белгіленген талаптарға сай жүргізілуде. Кейбір учаскелерде негізгі жол қабатын төсеу жұмыстары аяқталып, қалған бөліктерінде жұмыстар жалғасып жатыр.
Ақмола облысының жолаушылар көлігі және автомобиль жолдары саласына жауапты мамандарының айтуынша, биыл жол жөндеу жұмыстары бірнеше маңызды бағытты қамтиды. Олардың қатарында «Макинск – Ақсу – Торғай», «Жезқазған – Петропавл», сондай-ақ «Державинск – Жақсы – Есіл – Бұзылық» және «Жақсы – Чистополье» бағыттары бар.
Жол инфрақұрылымын жаңартуға бағытталған жұмыстар соңғы жылдары да тұрақты жүргізіліп келеді. Соңғы үш жылда облыс аумағында мыңдаған шақырым жол жөндеуден өткен.
Жолдың сапасы – елді мекендердің дамуына, экономиканың өсуіне және тұрғындардың өмір сапасына тікелей әсер ететін маңызды фактор. Сондықтан өңірдегі жолдарды жаңарту жұмыстары алдағы уақытта да жалғаса береді.
