Қазақстанда Жұмысшы мамандықтарының жылы аясында алғаш рет Техникалық және кәсіптік білім күні аталып өтті. Осыған орай ел аумағында өткен халықаралық TurkicSkills-2025 чемпионатында Көкшетау жоғары техникалық колледжі жоғары марапатқа ие болды, деп хабарлайды Өңірлік коммуникациялар қызметі.
Чемпионат қорытындысы бойынша оқу орны «Халықаралық ынтымақтастықты дамыту бойынша үздік колледж» атағына лайық деп танылды.
«Бұл марапат біз үшін үлкен құрмет. Біздің мақсатымыз – тек білікті мамандар даярлау ғана емес, сонымен қатар халықаралық тәжірибені игеру. Осы арқылы студенттеріміз тек Қазақстанда ғана емес, шетелде де табысты жұмыс істей алады», – деді колледж өкілі.
Аталған номинация – білім ордасы ұжымының әлемдік тәжірибені оқу үдерісіне енгізу бағытындағы жүйелі еңбегінің лайықты бағасы. Колледж шетелдік серіктестермен белсенді байланыс орнатып, бірлескен жобаларды жүзеге асыруда және өз тәжірибесімен еліміздің өзге оқу орындарымен бөлісуде.
Бүгінде Көкшетау жоғары техникалық колледжі – сұранысқа ие мамандарды даярлайтын және оқытушылардың кәсіби біліктілігін арттыруға жағдай жасайтын кәсіби даму орталығы болып табылады.
