Атбасар ауданы өнеркәсіп саласындағы қарқынын үдетуде: биылғы жылдың алғашқы төрт айында өндірілген өнім көлемі 13,6 миллиард теңгеден асып, өткен жылдың сәйкес кезеңімен салыстырғанда 44%-ға артты, деп хабарлайды Өңірлік коммуникациялар қызметінен.
Саланың жетекшісі – «Қамқор Локомотив» ЖШС-нің филиалы («АЭРЗ»), ол локомотивтерді жөндеу және құрастырумен айналысады. Биыл кәсіпорын 4,2 миллиард теңгенің өнімін шығарды.
«Жинақтау көлемі біраз төмендегенімен, зауыт өз беделін сақтап отыр. Алдағы уақытта ол әлдеқайда ауқымды жоба – локомотив құрастыру зауытының құрамдас бөлігіне айналмақ. Біз алғашқы секция 2026 жылдың соңында конвейерден шығады деп жоспарлап отырмыз», – деді спикер.
Локомотив құрастыру зауыты жобасы аясында 47 миллиард теңге инвестиция тартылып, 200 жұмыс орны ашылады. Жылына 360 секцияға дейін локомотив шығару көзделіп отыр.
«Аждар и К» ЖШС де өнеркәсіптік көрсеткіштерін екі есеге арттырды. Кәсіпорын 200 миллион теңге инвестиция салып, вагон-доңғалақ жөндеу шеберханасын ашты және Қытай мен Ресейден жаңа жабдықтар сатып алды.
Машина жасау саласымен қатар, азық-түлік өнеркәсібі де белсенді дамып келеді. 2025 жылы бірнеше өндірістік цехтардың қуаттылығын арттыру жұмыстары жүргізілуде:
-
«Интер Трайд» ЖШС-нің макарон өндірісі (1 млрд теңге),
-
«Шортанбай 2019» ЖШС-нің шұжық цехы (200 млн теңге),
-
А.Кұрманов ауылындағы май өңдеу желісі (инвестормен келіссөздер жүргізілуде).
«Біздің міндет – тек шикізатты өңдеу емес, дайын өніммен нарыққа шығу. Сондықтан біз сақтау, өңдеу және қаптауға дейінгі толық өндірістік тізбекті дамытуға жағдай жасап жатырмыз, – деді аудан әкімі.
Жалпы алғанда, жыл соңына дейін «Атбасар Су», «Ирченко Элеватор», «AtbasarTechnopark» секілді ірі кәсіпорындар бойынша өнеркәсіптік өнім көлемінің артуы күтіледі.
