Көкшетауда 500 оқушыға арналған заманауи жалпы білім беретін мектептің құрылысы басталды. Жоба бизнестің әлеуметтік әріптестігі аясында «ҚазЦИНК» ЖШС қолдауымен жүзеге асырылуда және облыс орталығы балаларының білім сапасын арттыруға бағытталған.
Өңір басшысы өскелең ұрпақты оқыту үшін сапалы жағдай жасаудың маңыздылығын атап өтті.
«Бұл мектептің салынуы – жай ғана жаңа нысан құрылысы емес, балалардың өсуі мен дамуына қажетті қолайлы білім беру ортасын қалыптастыруға жасалған қадам және ұлттық білім беру жүйесіне қосылған маңызды үлес. Бұған дейін «ҚазЦИНК» басшылығымен құрылыстың барлық егжей-тегжейлері талқыланып, бүгін құрылысқа бастау берілді. Құрылыс жұмыстарының барысы мен сапасын бақылауды жергілікті атқарушы органдар қоғам белсенділері және қоғамдық ұйымдармен бірлесіп жүзеге асырады», — деп атап өтті М.Ахметжанов.
Мердігер ұйымның өкілі Талғат Хамитовтың айтуынша, қазіргі уақытта шамамен 50 маман және қажетті құрылыс техникасы жұмылдырылған, дайындық құрылыс-монтаж жұмыстары аяқталуда. Жаңа мектеп заманауи стандарттарға сай салынып, оқушы орындарының көбейтілген санына шақталған. Оқу кабинеттері заманауи құрал-жабдықтармен жабдықталып, білім беру процесінің жоғары деңгейін қамтамасыз етуге мүмкіндік береді. Ғимаратты автономды түрде жылыту үшін блокты-модульді қазандық орнатылады.
Жергілікті тұрғындар жаңа білім беру нысанының құрылысын қолдады. Мектептің жанында тұратын Елена Гаврилова өз пікірін білдірді.
«Мен және менің балаларым №10 мектептің ескі ғимаратында оқыдық, ал енді оның орнына жаңа, заманауи мектептің салынатынына қуаныштымын. Мұнда біздің балаларымыз бен немерелеріміз білім алатын болады», — деді Е.Гаврилова.
Еске сала кетейік, №10 мектепте оқушы орындарының жетіспеушілігіне байланысты оның орнына заманауи оқу орнын салу туралы шешім қабылданған болатын.
