Ақмола облысының жас дарындары әлемдік деңгейдегі биіктерді бағындыруды жалғастыруда. Степногорск қаласының тумасы Тоқтар Жанәлі Түркияның Анталья қаласында өткен «Fibonacci International Robot Olympiad» халықаралық чемпионатында топ жарып, І орын иеленді, деп хабарлайды Өңірлік Коммуникациялар қызметінен.
Бұл жеңіс жас өренге Италияның Рим қаласында өтетін робототехникадан Әлем чемпионатына ресми жолдама сыйлады. №3 А. Пушкин атындағы мектеп-лицейінің оқушысы Жанәлінің бұл жетістігі — өңіріміздегі білім саласы мен цифрландыру бағытының дұрыс дамып келе жатқанының айқын дәлелі.
Оқушының халықаралық додада жеңіске жетуі — ұстаздың еңбегі, ата-ананың сенімі және демеушілердің қолдауының ортақ жемісі. Жетекшісі Талғат Әкімбаевтың кәсіби біліктілігі шәкірттің әлемдік деңгейде еркін бәсекеге түсуіне жол ашты.
Жеңістен соң Жанәлі өз әсерімен бөлісіп, алдағы мақсаттарын атап өтті:
«Түркиядағы жарыста Қазақстанның туын көтергенде ерекше мақтаныш сезімі болды. Робототехника — бұл тек технология емес, бұл — болашақ. Ендігі мақсатым — Римде өтетін Әлем чемпионатында еліміздің намысын абыроймен қорғап, көк туымызды Италия төрінде желбірету. Маған сенім артқан ұстаздарыма және демеушілерге алғысым шексіз», — дейді Тоқтар Жанәлі.
Сондай-ақ, талантты жастың шетелдік додаға баруына жағдай жасаған меценаттық қолдаудың арқасында Степногорск білімі әлемдік аренада танылуда.
Римдегі Әлем чемпионаты — бұл жай ғана жарыс емес, бұл әлемнің ең мықты жас инженерлері бас қосатын алаң. Степногорск өренінің мұндай деңгейге көтерілуі — аймақ үшін үлкен мақтаныш.
