Бұл жылы Ақмола облысының білім беру саласы үлкен серпіліс жасап, Президент Жолдауы аясында әзірленген үш жылдық жоспар бойынша Біржан сал ауданындағы үш мектепте – Андықожа батыр, Кеңащи және Макинка ауылдарында – кешенді реновация жобасын іске асырды. Бұл бастама өңірдегі білім инфрақұрылымын жаңартудың маңыздылығын айқын көрсетеді, деп хабарлайды Өңірлік Коммуникациялар қызметінен.
Жаңғырту барысында мектеп ғимараттарына күрделі жөндеу жүргізіліп, инженерлік жүйелер толықтай жаңартылды. Және оқу жабдықтары түгелдей жаңадан қамтамасыз етілді. Әсіресе физика, робототехника және әмбебап пән кабинеттерін заманауи техникамен жабдықтауға ерекше көңіл бөлінді.
«Мектептердің жаңаруы оқушылардың білім алуына қолайлы жағдай жасап, әр баланың қабілетін ашуға мүмкіндік береді. Өзгерістердің ғылымға және шығармашылық пәндерге деген қызығушылықты арттырып жатқанын байқап отырмыз», – деді «Қазақстан халқына» қорының өкілі.
Сонымен қатар реновация аясында мектептердің шатырлары, едендері, есік-терезелері толықтай ауыстырылды. Оқу кабинеттері жаңа жиһазбен жабдықталды. Мектеп аумағын абаттандыру жұмыстарына да басымдық берілді: жаяу жүргіншілер жолдары салынып, орындықтар мен көше шамдары орнатылды, демалыс аймақтары мен шағын спорт алаңдары жасақталды.
Үш мектептің жаңғыртылуы Ақмола облысының білім беру инфрақұрылымын дамытудағы маңызды қадам болды. Мұндай кешенді жұмыс өңірде сапалы білім мен балаларға жайлы, заманауи орта құруға шынайы көңіл бөлінетінін көрсетеді.
Біржан сал ауданындағы жаңартылған мектептер – тек жөндеуден өткен ғимараттар ғана емес, жаңа форматта білім беруге мүмкіндік беретін кеңістік. Заманауи кабинеттер, жайлы сыныптар және абаттандырылған аула жаңа буынның оқуына, шығармашылығына және жан-жақты дамуына жол ашады.
