Қараөткел ауылы тұрғындары таза сумен қамтылады. Ауылдың жағдайын жақсартып, тұрғындардың өмірін жеңілдетуге бағытталған таза ауыз су тарту жұмыстары жүргізіліп жатыр, деп хабарлайды Өңірлік Коммуникациялар қызметі.
Жоба бойынша ұзындығы 24 шақырымнан асатын су құбыры тартылып, ауылдағы 22 көше орталықтандырылған су жүйесіне қосылады. Құрылыс жұмыстары аяқталған соң су желісі Целиноград Су арнасы кәсіпорнының балансына беріліп, әрі қарай тұрақты қызмет көрсетіледі.
«Қазіргі уақытта құрылыс-монтаж жұмыстары белсенді түрде жүргізіліп жатыр. Қаржыландыру уақтылы жүргізілген жағдайда, жыл соңына дейін барлық көшелерге су беріледі деп жоспарлануда»,-деді басшылық.
Таза ауыз суға қолжетімділік — тұрғындардың денсаулығын қорғауға және ауылдағы өмір сапасын жақсартуға ықпал ететін маңызды фактор. Жоба іске асқан соң Қараөткел ауылының тұрғындары үздіксіз әрі сапалы ауыз сумен қамтылатын болады.
