Целиноград ауданында биылғы астық жинау науқаны табысты өтті. Елдегі ірі ауыл шаруашылығы кәсіпорындарының бірі – «Родина» агрофирмасы жоғары нәтижеге қол жеткізіп, үздік шаруашылық мәртебесін тағы да дәлелдеді, деп хабарлайды Өңірлік коммуникациялар қызметі.
Биыл агрофирма 23 мың гектар егіс алқабынан 40 мың тоннадан астам астық жинап алды. Орташа түсім – гектарына 18 центнер. Мұндай нәтижеге жұмысқа нақты ұйымдастыру, заманауи агротехнологияларды қолдану және жоғары деңгейдегі механизацияның арқасында қол жеткізілді.
Орақ науқанына 63 техника қатысқан. Оның ішінде 35 жаңа комбайн мен 9 қуатты трактор бар. Егістік алқаптарда дәстүрлі түрде бидай, арпа, сұлы және мал азықтық дақылдар егілген.
Агрофирманы 38 жылдан бері басқарып келе жатқан Иван Сауэр әр жетістік – адамдардың еңбегімен келетінін айтты.
«Әр механизатор, агроном мен маман өз үлесін қосады. Негізгі табыс – біздің ұжымның еңбегінде», – деді ол.
Шаруашылық қызметкерлері де өз әсерлерімен бөлісті. Механизаторлар заманауи техниканың жұмысын жеңілдеткенін айтса, агрономдар жаңа технологиялардың маңызын атап өтті.
«Толған қоймалар мен қуанған әріптестерді көргенде, еңбегіміздің зая кетпегенін түсінеміз», – дейді олар.
Осылайша, «Родина» агрофирмасының орақ науқанының сәтті аяқталуы – технология мен адам еңбегінің тиімді үйлесімінің жарқын мысалы болды. Бұл жетістік аймақ пен елдің азық-түлік қауіпсіздігіне үлкен үлес қосып отыр.
