Этно-топ «Орда» және облыстық филармонияның солистері Германияда өнер көрсетті. Концерттер Франкфурт пен Штутгарт қалаларында өтті, деп хабарлайды Өңірлік коммуникациялар қызметі.
Бұл шығармашылық сапар Ақмола облысының әкімі Марат Ахметжановтың қолдауы арқасында жүзеге асты. Қазақ өнерпаздарының концерті еуропалық көрермен тарапынан зор қызығушылық тудырды. Музыканттар ұлттық күйлерді, заманауи этно-композицияларды және классикалық туындыларды орындап, дала мәдениетінің бай мұрасын паш етті.
«Біздің әртістердің халықаралық сахнада өнер көрсетуі – зор мәртебе. Бұл – мәдениетімізді насихаттап, қазақ халқының дәстүрі мен өзіндік болмысын әлемге танытудың тамаша мүмкіндігі. Өнерпаздарымыздың талантына мақтанамыз, оларға шығармашылық табыс тілейміз», – деді Ақмола облысының әкімі Марат Ахметжанов.
Ұйымдастырушылардың айтуынша, концерттен кейін көптеген көрермендер Қазақстан жайлы көбірек білгісі келетінін жеткізген. Бұл жетістік Мемлекет басшысының қазақ өнерін шетелде ілгерілетудің маңызы туралы айтқан сөздерін айқын дәлелдейді.
Айта кетері, алдағы уақытта жергілікті әртістер жаңа шетелдік гастрольдерді жоспарлап отыр. Мұндай қадамдар еліміздің халықаралық аренадағы беделін нығайтуға ықпал етпек.
