2024 жылы Көкшетау қалалық емханасына 582 мыңнан астам келу тіркелді. Бүгінде емханаға 88 мыңға жуық тұрғын бекітілген, оның 24 мыңы – балалар. Ай сайын мұнда орта есеппен 48,5 мың адам медициналық көмек алады
Емхана құрамында 17 емдеу-диагностикалық бөлімше жұмыс істейді. Мұнда бастапқы медициналық-санитарлық, консультативтік-диагностикалық, стационарды алмастыратын және оңалту қызметтері көрсетіледі. Барлығы 51 учаске қызмет атқарады, оның ішінде педиатриялық, терапиялық және жалпы дәрігерлік тәжірибе учаскелері бар. Дәрігерлер жылына 160 мыңнан астам консультация жүргізеді, ал зертханада 700 мыңнан астам зерттеу жасалады
«Біздің басты мақсатымыз – халыққа сапалы медициналық көмек көрсету. Заманауи жабдықтар, білікті мамандар және ыңғайлы қызмет көрсету жүйесі ауруларды уақытылы анықтауға және емдеуге мүмкіндік береді», — деді қалалық емхананың бас дәрігерінің орынбасары Рысты Сыздык
Емхананың материалдық-техникалық базасы жыл сайын жақсарып келеді. Соңғы жылдары мұнда компьютерлік томография мен жоғары сапалы ультрадыбыстық зерттеу жүргізу мүмкіндігі пайда болды. Қала бойынша орналасқан алты ғимаратта түрлі бейіндік мамандар қабылдау жүргізеді, соның ішінде 11 мың бала тіркелген балалар емханасы да бар
Халық арасында салауатты өмір салтын насихаттау мақсатында «Денсаулық мектебі» және «Алтын жас» клубы жұмыс істейді. Мұнда жыл сайын 9 мыңға жуық адам білім алады. Көкшетау қалалық емханасы медициналық қызметтерді жетілдіруді жалғастырып, өңір тұрғындары үшін оларды қолжетімді әрі сапалы етуге ұмтылуда
