Ақмола облысында суға шомылу маусымы аяқталды. Бұл маусым барысында облыс аумағында 74 ресми шомылу орны жұмыс істеді және халықтың қауіпсіздігін қамтамасыз ету мақсатында Төтенше жағдайлар департаменті бірнеше маңызды шаралар атқарды. Бұл туралы брифинг барысында Ақмола облысы ТЖД азаматтық қорғаныс басқармасының бастығы – Бақыт Абланов мәлімдеді, деп хабарлайды Өңірлік коммуникациялар қызметінен.
Шомылу маусымы кезінде департамент көптеген патрульдеу шараларын өткізіп, халыққа қауіпсіздік туралы ақпарат таратуға баса назар аударды. Нәтижесінде, суға бату жағдайлары өткен жылмен салыстырғанда айтарлықтай азайғандығы туралы ерекше атап өтті.
«Егер өткен жылы суға бату салдарынан 13 адам қайтыс болса, биыл бұл көрсеткіш 19 адамды құрады. Дегенмен, жақсы жаңалық — өткен жылы қайтыс болған балалар саны (3 бала) биыл өзгеріссіз қалғанымен, жалпы суға бату саны шамамен 50%-ға азайғаны.Ең жиі кездесетін себептер — алкогольді ішімдіктер ішіп шомылу, балаларды қараусыз қалдыру және өз күшін асыра бағалау», – деді басқарма басшысы.
Күздің алғашқы күнінен аңшылық және балық аулау маусымы басталып, облыс аумағында су айдындарын балық аулаушылар жиі пайдаланатын болды. Бұл кездері Төтенше жағдайлар департаменті жергілікті полиция, экология инспекциясы мен басқа да құрылымдармен бірге рейдтер мен профилактикалық шаралар жүргізуде.
Дегенмен, тәжірибе көрсеткендей, дәстүрлі әдістер ғана халықты толық қамтуға жеткіліксіз. Сондықтан департамент балық аулау құралдарын сататын дүкендермен жұмыс істеп, қауіпсіздік ережелері туралы ақпарат таратуда. Сонымен қатар, мобильді қосымша арқылы да балықшыларға ескерту мен қауіпсіздік ережелері жіберіліп жатқандығы туралы да ерекше атап өтті.
«Балық аулау кезінде қауіпсіздікті сақтау үшін қайықты тексеріп, құтқарушы құралдарды қолдану керек. Сонымен қатар, түнде балық ауламау және алкогольді ішпей, тексерілген қайықта аулау маңызды», деді спикер
Ақмола облысындағы су айдындарында қауіпсіздікті қамтамасыз ету мақсатында жүргізілген шаралар өз нәтижесін беріп келеді. Дегенмен, әлі де болса адамдардың қауіпсіздік ережелерін сақтау маңызды. Балық аулаушылар мен суға түсетіндерге қойылатын талаптар мен ережелерді дұрыс орындау — қайғылы оқиғалардың алдын алудың негізгі жолы болмақ.
