Көкшетаудағы «Bolashaq saraiy» балалар мен жасөспірімдер сарайында ҚР Президенті атынан ұйымдастырылған облыстың басты жаңажылдық шыршасы өтті. Мерекелік шараға аймақтың 20 ауданынан келген 9–13 жас аралығындағы шамамен 200 бала қатысты, деп хабарлайды Өңірлік коммуникациялар қызметі.
Салтанатты шараға аз қамтылған және көпбалалы отбасылардың балалары, ерекше білім беруді қажет ететін балалар, мамандандырылған және түзету мектеп-интернаттардың тәрбиеленушілері, қиын өмірлік жағдайға тап болған балаларды қолдау орталығының тәрбиеленушілері, сондай-ақ үлгерімі үздік оқушылар мен зияткерлік, шығармашылық және спорттық олимпиадалар мен байқаулардың жеңімпаздары шақырылды.
Балалар үшін екі күнге жоспарланған мазмұнды мерекелік бағдарлама ұйымдастырылды: мәдени экскурсиялар, ойын-сауық іс-шаралары мен мерекелік кешкі ас. Бүгін іс-шаралардың кульминациясы – Акмола облысының әкімі Марат Ахметжановтың қатысуымен өткен Президенттік жаңажылдық шырша және «Ғажайыпқа толы Жаңа жыл» атты театрландырылған қойылым болды.
Мерекеге қатысушыларды құттықтаған өңір басшысы өсіп келе жатқан ұрпақтың дамуына жағдай жасауға облыста ерекше көңіл бөлінетінін атап өтті.
«Бұл жаңажылдық шырша Мемлекет басшысының бастамасымен ұйымдастырылып отыр. Ең бастысы – жақсы білім алып, лайықты тәрбие алу, заманауи мектептерде оқып, спортпен шұғылдану. Алдарыңызда үлкен жол ашық. Өзіңізге сеніңіздер, арманға сеніңіздер және еңбектеніңіздер – сонда бәрі міндетті түрде орындалады», – деді Марат Ахметжанов.
Іс-шараның жоғары деңгейде ұйымдастырылғанын бірге келген педагогтер де атап өтті. Бурабай ауданынан келген педагог Абай Батин мерекелік көңіл күй үшін ұйымдастырушыларға алғысын білдірді.
«Біз он оқушыны алып келдік. Балаларға бәрі қатты ұнады – жарқын безендіру, фотозоналар, костюмдер және мазмұнды бағдарлама. Олар үшін бұл – үлкен оқиға әрі ұмытылмас әсер», – деді оқу ісінің меңгерушісі.
Өз әсерлерімен балалардың өздері де бөлісті. Жарқайың ауданы Құмсуат ауылынан келген оқушы Дәнел Маликова шараға Медуза Горгона бейнесіндегі қолдан жасалған костюммен келіпті.
«Өте жақсы әсер алдым. Маған аниматорлар мен мерекелік атмосфера ұнады. Біз музейде де, театрда да болдық, әсіресе музей есімде қалды. Костюмді анам екеуміз бірге жасадық, қойылым мен жаңажылдық шыршаны асыға күтіп отырмын», – деді ол.
