Бүгін Көкшетау қаласының тұрғындары үшін ерекше күн болды. Қырық жылдан бері жөндеу көрмеген Мағжан Жұмабаев атындағы Ақмола облыстық әмбебап ғылыми кітапхана күрделі жөндеуден өтіп, заманауи форматта қайта ашылды. Бұл тарихи сәтте Сәкен сері Жүнісов атындағы мәжіліс залы мен ақын, жазушы, драматург Төлеген Қажыбайдың шығармашылық кабинеті салтанатты түрде таныстырылды.
Шараның маңыздылығының бірі – қазақ әдебиетінің көрнекті өкілі, ақын, жазушы, драматург Төлеген Қажыбайдың шығармашылық кабинетінің ашылуы. Кабинетте жазушының өзі қолданған жеке заттары, кітаптары, қолжазбалары, ордендері мен медальдары, түрлі марапаттары, естелік фотосуреттері жинақталған. Кабинет ашылу салтанатына қатысқан Төлеген Қажыбайдың ұлы, филология ғылымдарының кандидаты Аян Төлегенұлы алғысын айтып, әсерімен бөлісті.
«Әкеміздің рухани мұрасы мәңгілік. Бұл кабинет – оның шығармашылығын құрмет тұтқан барша оқырманға арналған орын. Жастар осы жерден Төкеңнің еңбектерімен танысып, тәлім алады деп сенеміз. Оның өмірі мен шығармалары – өскелең ұрпаққа рухани азық», деді Төлеген Қажыбайдың ұлы.
Биыл қазақ әдебиетінің ақберені, Қазақстанның Халық жазушысы Сәкен сері Жүнісовтың туғанына 90 жыл. Осыған орай кітапханада жазушының есімімен аталған мәжіліс залы ашылды. Залда жазушының жеке кітапханасынан алынған кітаптар мен фотосуреттер қойылған. Мәжіліс залының ашылу салтанатындағы ғылыми конференцияға Ақмола облысы әкімінің орынбасары Алтынай Әміренова және зиялы қауым өкілдері қатысты. Конференцияда жазушының шығармашылығы мен қазақ әдебиетіне қосқан үлесі кеңінен талқыланды.
Облыстық кітапхана директоры Қуаныш Оспанның айтуынша, жөндеу жұмыстары үшін 409 миллион теңге бөлінген. Нәтижесінде кітапхананың іші толық жаңартылып, жаңа жиһаздар, заманауи компьютерлер және сканерлер алынды. Қосымша оқу залдары мен арнайы зерттеу орындары ашылды.
Мағжан Жұмабаев атындағы кітапхананың қайта ашылуы – Ақмола өңірінің рухани өміріндегі елеулі оқиға. Бұл жер тек оқырман үшін ғана емес, қазақ әдебиеті мен мәдениетін насихаттайтын маңызды орталыққа айналады деп күтілуде.
