Көкшетау қаласының оқушылары Инжу Асыл мен Нұрай Нұралы цифрлық шешімдердің болашағы жастардың қолында екенін дәлелдеді. Олардың Ashyq Qala Kokshetau атты жобасы — қала тұрғындары мен жергілікті билік арасындағы ашық әрі тиімді байланыс орнатуға бағытталған инновациялық платформа, деп хабарлайды Өңірлік коммуникациялар қызметі.
Жобаны қыздар Kokshetau AI Hackathon байқауында таныстырып, жүлделі орынға ие болды. Бірақ бұл бастама тек байқаумен шектелмей, қоғам тарапынан үлкен қызығушылық тудырды. Платформа қалалық өмірді өзгертіп, тұрғындардың шешім қабылдау процесіне белсенді қатысуына жол ашатын үлгі ретінде қарастырылып отыр.
Ashyq Qala Kokshetau — жай ғана IT-жоба емес. Бұл қоғам мен билік арасындағы өзара әрекеттесу моделін өзгертудің алғашқы қадамы. Платформа арқылы әр тұрғын өз қаласындағы мәселе туралы хабарлап, ұсыныс бере алады және оның қалай шешіліп жатқанын бақылап отырады.
Жобаның авторларының бірі Инжу Асылдың айтуынша, идея тұрғындардың пікірін ескеретін шынайы «ақылды қала» ортасын құру ниетінен туған.
«Бұрын адамдар тек дайын шешімдерге жауап беретін. Ал оларды талқылауға қатысуға мүмкіндік болмады. Біз мұны өзгерткіміз келді. Әрбір тұрғынның пікірі маңызды болуы тиіс деп ойлаймыз», — деді ол.
Платформа жасанды интеллект алгоритмдерін пайдаланады. Ол ұқсас ұсыныстарды біріктіріп, ең танымал бастамаларды іріктейді және қажетсіз ақпаратты сүзгіден өткізеді. Бұл әкімдікке маңызды мәселелерге назар аударып, тиімді кері байланыс алуға мүмкіндік береді.
MVP-нұсқасы Vibe Coding және Generate AI құралдарының көмегімен жасалған. Біріншісі — визуалды интерфейс пен өзара әрекет логикасына, екіншісі — пайдаланушылардың өтініштерін талдауға және басымдықтарды анықтауға жауап береді.
«Біз платформаны нақты шешім қабылдау құралына айналдыруды мақсат еттік. Сондықтан конструктивті ұсыныстар мен жай пікірлерді ажырата алатын сүзгі жүйесін енгіздік», — дейді Нұрай Нұралы.
Жоба алғашқы сынақтан өтті. Пайдаланушылар интерфейстің ыңғайлылығы мен жүйенің түсініктілігін атап өтті. Жасанды интеллект модулі ұқсас өтініштерді сәтті анықтап, біріктіре алады. Бұл идеяның технологиялық әлеуеті жоғары екенін және кеңейту мүмкіндігі бар екенін дәлелдейді. Қазір команда функционалды жетілдіріп, нақты жағдайларда сынақ жүргізуге дайындалып жатыр.
