Қыстың екі айы аяқталғанына қарамастан, жүргізушілер мен жолаушылардың өміріне төнетін қауіп әлі де артып отыр. Бұл туралы Облыстық Төтенше жағдайлар департаменті мен Полиция департаментінің өкілдері мәлімдеді, деп хабарлайды Өңірлік Коммуникациялар қызметінен.
ТЖ жою басқармасының бастығы, подполковник Аслан Нұрқановтың айтуынша, маусым басталғалы бері құтқарушылар қар құрсауынан 134 адамды құтқарған. Олардың ішінде 120 шетелдік азамат пен 33 бала бар. Сонымен қатар, облыста дауылды ескертулер саны екі жүзден асып кеткен.
«Ақмола облысындағы жағдай әлі де күрделі. 17–18 ақпан күндері секундына 28 метрге дейін жететін дауылды жел мен боран күтілуде. Барлық күштеріміз жоғары дайындық режиміне көшірілді, тиісті қызметтермен өзара іс-қимыл ұйымдастырылды. Азаматтарды елді мекендерден тыс жерге шықпауға шақырамыз», – деді Аслан Нұрқанов.
Брифинг барысында жол қауіпсіздігіне де ерекше көңіл бөлінді. Жол-патрульдік қызметінің аға инспекторы Талғат Ауғановтың мәліметінше, облыста көктайғақ пен көліктің техникалық дайындығының жеткіліксіздігі салдарынан 30-дан астам жол-көлік оқиғасы тіркелген. Аймақ жолдарында тәртіпті қамтамасыз ету үшін 81 блокпостты орналастыруға дайындық жүргізілуде.
«Кейбір жүргізушілер тозған дөңгелекпен жолға шығып, қауіпсіздік талаптарын елемейді. Мұндай жағдайда көліктің жарамсыз күйі мен жол қозғалысы ережелерін бұзғаны үшін ҚР ӘҚБтК-нің 590 және 610-баптары бойынша айыппұл қарастырылған. Сондай-ақ, ұсақ жол апаттарын eGov қосымшасындағы “Еурохаттама” арқылы рәсімдеуге болады», – деді Талғат Ауғанов.
Кездесу соңында спикерлер Ақмола облысының тұрғындары мен қонақтарын SMS-хабарламаларды елеусіз қалдырмауға шақырды. Полиция мен құтқару қызметтерінің бірлескен жұмысы қауіпсіздікті қамтамасыз етуге бағытталғанымен, қайғылы жағдайлардың алдын алуда жүргізушілердің жеке жауапкершілігі шешуші рөл атқаратыны атап өтілді.
