Ақмола облысы соңғы жылдары қарқынды дамып келе жатқан өңірлердің бірі болып табылады, сондықтан қоршаған ортаны қорғау және экологиялық қауіпсіздік мәселелері ерекше назарда. Өткен жылғы деректерге сүйенсек, облыста атмосфераға шығатын зиянды заттардың көлемі шамамен 140 мың тоннаға жуық болған. Негізгі шығарындылар Степногорск, Көкшетау, Біржан сал және Зеренді аудандарында тіркеледі. Бұл туралы брифинг барысында Ақмола облысы Экология департаментінің басшысы Мағзұм Кукумбаев мәлімдеді, деп хабарлайды Өңірлік Коммуникациялар қызметі.
Басшының мәлімдеуінше, биылғы жылы кәсіпорындармен бірлесе отырып ауаға шығатын зиянды заттар шамамен 19 мың тоннаға қысқартылған. Бұл экологиялық жағдайды жақсартуға нақты үлес қосқан шаралар.
«Мысалы, «Көкшетау Жылу» кәсіпорнында фильтрлерді жөндеу мен жаңарту нәтижесінде шығарындылар бірнеше мың тоннаға азайды. «Интергаз Центральная Азия» компаниясы пайдаланылмайтын төрт шығарындылар көзін жойып, ауаға ластаушы заттардың көлемін айтарлықтай азайтты»,-дейді басшы.
Сумен байланысты эмиссия көлемі де азайды. Бурабай ауданындағы кәсіпорындардың бірі су төгінділерін азайту нәтижесінде шамамен төрт мың тоннаға жуық зиянды заттардың қоршаған ортаға түсуін тоқтатты. Өндірістік қалдықтар көлемі де қысқарып, шамамен 35 мың тоннаға дейін азайды.
Жыл басынан бері өңірде 80-ге жуық кәсіпорын тексеруден өтті. Профилактикалық бақылау, жоспардан тыс тексерулер мен құжаттық тексерулер нәтижесінде заңбұзушылықтар анықталып, кәсіпорындарға оларды жою жөнінде нұсқамалар берілді.
«Құқықбұзушылықтар анықталған жағдайда біз кәсіпорындарға нақты ұсыныстар береміз және олардың орындалуын қадағалаймыз. Бұл – экологиялық қауіпсіздікті қамтамасыз етудің негізгі жолы», – дейді департамент басшысы.
Департамент жыл ішінде жүзден астам әкімшілік істі қарап, жалпы сомасы қырық миллион теңгеден астам айыппұл салды. Кейбір істер сотқа жолданып, сот шешімімен бірнеше азамат пен кәсіпорын әкімшілік жауапкершілікке тартылды.
Құжаттық тексеру арқылы 180-нен астам нысан қаралды. Оның ішінде жиырмаға жуық кәсіпорында сәйкессіздіктер анықталып, олар келесі жылы профилактикалық тексеруге енгізілмек. Ең жиі кездесетін бұзушылықтар – эмиссияны рұқсатсыз көбейту, рұқсатсыз жұмыс істеу, экологиялық сараптама талаптарын орындамау және қалдықтарды дұрыс басқармау.
Сонымен қатар, департамент биыл экологиялық рұқсаттар, скрининг және қоршаған ортаны бағалау қорытындылары сияқты 500-ден астам мемлекеттік қызмет көрсетті. Барлық қызметтер электронды форматта жүзеге асырылды, азаматтардан шағым түскен жоқ.
«Біз жұмысымызды әрі қарай да күшейтуді, кәсіпорындардың экологиялық талаптарды толық орындауын қадағалауды жалғастырамыз. Бұл – Ақмола облысының тұрғындары үшін таза ауа мен қоршаған ортаны қамтамасыз ету жолындағы тұрақты шаралар», – деді Кукумбаев Мағзұм Асхатұлы.
