2024 жылы спорт нысандарының саны 99-ға жетті. Жеке инвесторлардың қолдауымен Қараөткел, Талапкер және Қоянды ауылдарында жаңа футбол манеждері, сондай-ақ Қоянды ауылында жабық және ашық үлгідегі шағын футбол алаңдары салынды. Бұл жұмыстар аудан тұрғындарының спортқа деген қызығушылығын арттыруға және бұқаралық спортты дамытуға үлкен серпін беруде. Бұл туралы брифинг барысында аудан әкімінің орынбасары Жәнібек Толқынбек мәлім етті, деп хабарлайды Өңірлік коммуникациялар қызметінен.
Целиноград ауданында спорттық инфрақұрылымды дамыту белсенді түрде жалғасуда. Спортқа деген қызығушылықтың артуына орай, бір жыл ішінде 7000-нан астам адамның қатысуымен 90-ға жуық бұқаралық спорттық іс-шаралар ұйымдастырылды. Бұл көрсеткіштер ауданның салауатты өмір салтын насихаттауға ерекше көңіл бөлетінін көрсетеді.
«Өткен жылдың өзінде ауданда спортпен шұғылданатын адамдар саны қырық мыңға жуықтаған. Бұл аудан халқының тең жартысын құрайды. Балалар мен жасөспірімдерді спортқа тарту мақсатында аудандық балалар мен жасөспірімдер спорт мектебі үлкен мүмкіндіктер ұсынуда. Қазіргі таңда бұл мектепте спорттың 20 түрі бойынша оқу-жаттығу сабақтары өткізіледі. Жас спортшылардың жетістіктері де көңіл қуантады. 2024 жылдың қорытындысы бойынша ауданның жас спортшылары әртүрлі спорт түрлері бойынша жоғары нәтижелерге қол жеткізді», деді спикер.
Целиноград ауданында олимпиадалық емес спорт түрлері мен ұлттық спорт түрлерін дамытуға ерекше көңіл бөліп келуде. Сонымен қатар, мүмкіндігі шектеулі жандарға арналған спорт түрлеріне де белсенді қолдау көрсетілуде. Бұл бағыттағы жұмыстар аудан тұрғындарының дене шынықтыру мен спортқа теңдей қол жеткізуін қамтамасыз етеді.
«Целиноград ауданында спортты дамытуға арналған кешенді шаралар өз нәтижесін беруде. Жаңа спорт нысандарының ашылуы, бұқаралық спорттық іс-шаралардың көбеюі, жас спортшылардың жетістіктері – мұның барлығы ауданның спорт саласындағы серпінді дамуын көрсетеді. Алдағы уақытта да бұл бағыттағы жұмыстар қарқынды жалғасып, жаңа белестерге жетуге ықпал ететін болады», деп түйіндеді аудан әкімінің орынбасары.
