Көкшетау қаласында Ақмола және Солтүстік Қазақстан облыстарының әкімдіктері, табиғи монополия субъектілері, құрылыс және жобалау ұйымдары, отандық өндірушілер, кәсіпкерлер палаталары, салалық қауымдастықтар мен БАҚ өкілдерінің қатысуымен ұлттық жобаны түсіндіруге арналған көшпелі семинар-кеңес өтті.
Іс-шарада қатысушыларға «Энергетика және коммуналдық секторды жаңғырту» ұлттық жобасының негізгі тетіктері таныстырылды. Отырыста ҚР Ұлттық экономика министрлігі Табиғи монополияларды реттеу комитетінің төрағасы Тимур Қосымбаев, Индустрия және құрылыс министрлігінің, «Бәйтерек» ҰБХ» АҚ, «Қазцентр ЖКХ» АҚ, «Қазақстан тұрғын үй компаниясы» АҚ және «Қазақстанның Даму Банкі» АҚ өкілдері баяндама жасады.
2025 жылы Ақмола облысында «Степногорск Теплотранзит» ЖШС базасында пилоттық жоба іске асырылуда. Жоба аясында 4,3 шақырым жылу желілерін қайта құру және 11 бірлік жабдықты (сорғылар, ысырмалар және т.б.) ауыстыру жоспарланған. Бұл шаралар инфрақұрылымның тозуын 3,32%-ға төмендетуге мүмкіндік береді. Компания 22 мыңнан астам абонентке, оның ішінде 21,5 мың тұрғынға және шамамен 600 заңды тұлғаға қызмет көрсетеді.
Сонымен қатар, жобалық кеңсе тобы «Көкшетау Жылу» кәсіпорнының нысандарында болды. Мұнда биыл шамамен 5 шақырым жылу желісі қайта жаңғыртылып, үш қазан агрегаты жөнделуде және автоматтандырылған бақылау жүйесі енгізілуде. Бұл шаралар тозуды 4,39%-ға төмендетуге ықпал етеді. Кәсіпорын Көкшетау қаласының, Красный Яр ауылы мен Станционный кентінің 66 мыңнан астам абонентін қамтиды.
2026 жылы Солтүстік Қазақстан облысында «Петропавл жылу желілері» ЖШС, «Солтүстік Қазақстан электржелілік тарату компаниясы» АҚ, «Қызылжар су» ЖШС секілді кәсіпорындарда жаңғырту жобалары іске асырылмақ. Нәтижесінде өңірдегі инфрақұрылымның орташа тозу деңгейі 21%-ға төмендейді деп күтілуде.
Келесі жылы Ақмола облысына 89,17 млрд теңге, ал Солтүстік Қазақстан облысына 130,56 млрд теңгекөлемінде инвестиция бағыттау жоспарланып отыр.
Комитет төрағасы Тимур Қосымбаев инфрақұрылымды жаңғырту — ел экономикасының тұрақтылығы мен халықтың өмір сапасын айқындайтын стратегиялық таңдау екенін атап өтті. Оның айтуынша, бұл жобаға отандық өндірушілер мен бизнестің белсенді қатысуы маңызды.
Көкшетаудағы семинар энергетика және коммуналдық секторды жаңғырту бағдарламасын өңірлерде түсіндіруге арналған жобалық кеңсенің екінші көшпелі отырысы болды.
