Көкшетау қаласының 72 жастағы тұрғыны халықаралық деңгейдегі беделді Giro d’Almaty-2025 веложарысында үздік үштіктің қатарына еніп, «қола» медаль иегері атанды, деп хабарлайды Өңірлік коммуникациялар қызметі.
Зейнеткер Анатолий Гонаго жас шамасына қарамастан, спорт пен жеңіске деген ұмтылыстың шексіз екенін дәлелдеді. Ол 60+ санатында жоғары нәтижеге қол жеткізіп, тамаша дене шынықтыру дайындығы мен ерік-жігерін көрсетті.
Жарысқа Қазақстан мен шетелден келген 200-ден астам спортшы қатысты. Қатысушыларды күрделі әрі шыдамдылықты талап ететін қашықтық күтіп тұрды. Әр секунд жарыстың тағдырын шешті. Соған қарамастан, ақмолалық ардагер мәреге дейін табандылық танытып, жеңіс тұғырына көтерілді.
«Мен он жылдан астам уақыттан бері велоспортпен айналысамын. Мен үшін жарыстың өзіне қатысудың өзі – үлкен қуаныш. Ал медальмен тұғырға шығу – бұл ерекше сезім», – деді Анатолий Гонаго.
Спортшының өмір жолы жастар үшін үлгіге, ал спортты кейінге қалдырып жүргендер үшін нағыз шабыт көзіне айналды. Оның табандылығы мен өмірге деген құлшынысы кез келген жаста жетістікке жетуге болатынын айғақтайды.
Giro d’Almaty жарысындағы «қола» медаль — Анатолий Гонаго үшін жай ғана жүлде емес, рух пен өзіне деген сенімнің символына айналды.
